Wat es dat, wat es loß
En d´r Achterstroß
Ne Knubbel Minsche steiht
Un wat do vür sich jeiht
Kein Düüvel weiß Bescheid
Alles es verschreck
Jeder frög wie jeck
Wo kütt dä Rauch blos her
Un paar Minutte drop do woß
Ald jeder dat Malör
Em drette Stock am Finster steiht
En Frau die wink un schreit
Kutt erop - kutt erop - kutt erop
Bei Palms do es die Pief verstopp
Jetz hätt die ärm Frau Palm
Die janze Stuff voll Qualm
Alles läuf un rennt
Jeder schreit: Et brennt
Et qualmp ald immer mih
Vür Neujier wie noch nie
Luurt alles en de Hüh
Vun dem Rauch wie en Katz
Koloraabeschwatz
Die Lück sin op d'r Stroß
Als hätten se d´r janzen Daach
Em Dreck eröm jerooß
Un zweschendurch en einer Tour
Do hürt mer schreie nur
Kutt erop - kutt erop - kutt erop...
Mer sich denke kunnt
En ner Veedelstund
Die Feuerwehr wor do
Die soch dä Ovve noh
Un jetz ich sage jo
Dat dat kumme sullt
Wore Kinder schuld
Wat hann die sich jefreut
Die hatte drei Paar naaße Söck
Höösch en de Pief jedeut
Un immer hoot mer dat Jeschrei
Obwohl et längs vorbei
Kutt erop - kutt erop - kutt erop...
© Musik & Lyrics: Willi Ostermann - Gemeinfrei - PD
INFO: Ein wahres Liedjuwel, ein ewiger Favorit vom berühmten Liedermacher aus Köln-Mülheim.
A Long time ante facebook woren de Lück och schon süchtig nach News & Events:
Un immer hoot mer dat Jeschrei obwohl et längs vorbei.
Falls Ihnen/Euch die Melodie fremd erscheint, sie ist transkribiert nach Ostermanns Aufnahme von 1929. Er singt nicht grade astrein, Sänger war er ja auch nicht im Hauptjob. Autotune oder ähnliche Tonverschönerungssoftware waren in weiter Ferne. (siehe: wikipedia ▸ Autotune.) Also frischauf: jede Jeck sing anders. Kommt übrigens auch gut als Reggae.
